Assam : Sorkarin dan phal loh lungalhthei khur 263 hmuchhuak

Assam sorkar chuan an state chhungah dan phal loha siam lungalhthei khur 263 an hriatchhuah thu a puang a, hei hi autonomous council pahnih thuneihna hnuaia awm a ni. Sorkar chuan kum thum kalta chhung khan dan phal loh lungalhthei ton 25,630 chuang an man thu Assembly hnenah a hriattir bawk.

Independent MLA, Akhil Gogoi zawhna chhangin, mines and minerals minister Kaushik Rai chuan North Cachar Hills Autonomous Council (NCHAC) ah lungalhthei khur (rat-hole mine) 248 an hmuchhuak a, Dima Hasao district pawh a huam tel a ni, a ti. Hetihlai hian Karbi Anglong Autonomous Council-ah lungalhthei khur 15 hmuh a ni bawk a, East Karbi Anglong leh West Karbi Anglong district-te a huam tel bawk a ni.

National Green Tribunal (NGT) chuan kum 2014 khan rat-hole mining hi a khap tawh a, chuti chung chuan dan loa lungalhthei laihchhuahtute chuan an la siam chhunzawm reng a ni.