Nagaland palaiten Amit Shah an hmu dawn

Nagaland chief minister Neiphiu Rio kaihhruainain party hrang hrang aiawhte chuan Myanmar nena inrinaa Free Movement Regime (FMR) ti tawp lo tura ngen turin union home minister Amit Shah an hmu dawn.

Union Home Minister hmuh chungchang hi Assembly session, March 7-ah khan an rel a ni. An kal hun tur tak erawh an la sawichiang lo.

Sorkar laipui chuan nikum January thla khan Myanmar nena inrinaah ramri hrula chengte zalen taka inkalpawh tawn phalsakna, Free Movement Regime (FMR) chu ti tawp a tum thu sawiin, ramri hrula chengte pawh visa tel lo chuan ramri paltlang phalsak an ni dawn lo a ni. Sorkar laipui thutlukna hi Nagaland sorkar chuan a dodal a, CM Rio pawhin India-Myanmar ramri lehlam lehlama Naga hnamte chengin, inzawmna ṭha tak an neih chu khuahkhirhna siam hian an nghawng thei dawn a ni, a ti.

Assembly session-ah pawh CM chuan FRM tih tawp hian ram pahnih ramri hrula cheng hnam hrang hrangte inlaichinna a tih chhiah phah theih tu leh, ramri hrula lo neih dan thlenga a tih buai theih dawn thu a sawi. Hei vang hian sorkar chuan FMR tih tawp a tum hi a ennawn a ngai a ni, tiin a sawi.

India-Myanmar ramri hi km 1,643-a thui niin Mizoram, Manipur, Nagaland leh Arunachal Pradesh nen an ri a, heng hmunah hian FMR hi hman vek a ni. FMR hi kum 2018 khan Act East policy hnuaiah siam a ni. Mahse tun hnaia Manipur tualchhung buaina chhuak nghawng zel leh, an buaina pakhat hi Myanmar aṭanga lut an tam avang nia sawi a awm hnuah sorkar laipui chuan FMR hi tih tawp a tum ta nia ngaih a ni.