MUDA-in CSWO lakah inpuh hmingchhiatna thubuai siam

Meghalaya Urban Development Authority (MUDA) chuan Civil society Women’s Organisation (CSWO) lakah inpuh hmingchhiatna thubuai pahnih court-ah a thehlut a, cheng vaibelchhe nga chawi turin a phut.

CSWO aiawha hriattirna dawngtu, president Agnes Kharshiing chuan sor­kar­in a ngaihdan khapbehsak a tum a ni, a ti.

In sak dan chungchanga MUDA dan siamṭhat (amend) state cabinet-in a pawm hnuah Kharshiing hian Chief Minister Mukul Sangma chu lehkha thawnin, dan siamṭhat chu dan bawhchhiatna, dan hmang veka pawmpuina tur a ni, a ti.

Kharshiing chuan MUDA dan bawhchhe ṭhinte chu mi lian leh hmelhriat nei ṭhate an ni a, hemi ṭanpui nan hian sorkar chuan dan chu a hnungtawlh zawngin siamṭhat a tum a ni, a ti.

MUDA chuan court kaltlanga Khar­­­­shiing hnena hriattirna a pekah, a thusawi chu inpuh hmingchhiatna leh building lian sak kawnga khuahkhirhna awmte zahlohna leh tualchhung mipuite duhdan zahlohna a ni tiin a sawi.

Meghalaya sorkar chuan MUDA dan siamṭhat hi tun hnai khan a remti a, in chhawng sang zawng chu metre 19 aṭangin metre 17-ah a tihniam a ni. Mahse hetihlai hian in chhawng sang sak tam takte chu Meghalaya building byelaws, 2001-in a phal chin aia sangte an ni hlawm.

"Meghalaya building byelaws, 2001 chuan building sang sak phal chin chu metre 13-ah a bithliah a, hei hi sorkar puh hmingchhiat tumna ni loin, sorkar rorel dan fel lo khalh ngil tumna mai a ni a, he thil hi khua leh tui ṭhate tih tur dik tak a ni," tiin Kharshiing chuan a sawi.

New Shillong Township dinna atana sorkarin mimal ram a laksak chungchangah Kharshiing hian zawhna a siam avangin MUDA chuan a hmain a lakah inpuh hmingchhiatna thubuai court-ah a siamsak leh a, vaibelchhe nga chawi turin a lo phut tawh bawk.