Manipur ILPS movement: Mipuiin sorkar intiamkamna an phut

Manipur-a inner line permit (ILP) system kalpui phuttu, Joint Committee on Inner Line Permit System (JCILPS) meeting chuan Ningani khan state sorkar chu leilung fate humhalhna tur bill siam nan thla khat hun pek a rel.

Thla khat hun a bithliahsak hi state assembly-a Manipur Regulation of Visitors, Tenants and Migrant Workers Bill, 2015 hnuhkir ni, July 15 aṭanga chhiar ṭan a nih tur thu JCILPS thuchhuak chuan a tarlang a, August 15 hma ngeiin bill thar pass a phut a ni.

State sorkarin bill thar a buatsaih turah JCILPS chuan an thil phut panga telh ngei an phut thu sawiin, hemi kawngah hian state sorkar intiamkamna ziaka pek an phut bawk.

An thil phut hi state sorkarin a remtih hunah chauh inbe tura sorkar sawmna chu pawm an tum thu JCILPS meeting chuan a tarlang.

JCILPS chuan July 8-a kawng­zawhnaa police te kuta thi, Sapam Robinhood Singh thihnaa mawhphurtu police te chu state sorkarin judicial inquiry a neih chhunga suspend an phut thu a tarlang bawk a, inquiry chu thla thum chhunga neih zawh hman tura mipui hmaa sorkar intiamna hriat an phut thu an tarlang bawk.

Meeting-ah hian JCILPS convener-in-charge Kh Ratan chuan thu sawiin, JCILPS chuan a ṭanhmun a sawn loh thu leh a thil phut ngaiah a la din ngheh thu a sawi a, mipuiin sorkar lakah rinna nghat ngam tawh lo mah se, an thil phutah a tawp thlenga beih an tum thu a sawi.