NE-a project kalpui dan tikhauh dawn

Hmarchhak biala sorkar laipui project kalpui meka harsatna awmte sutkian nan sorkar laipui chuan hmarchhak state te chu Global Positioning System (GPS) hmang vek turin a hriattir.

Development of North Eastern Region (DoNER) Minister Jitendra Singh chuan he thu hi Rajya Sabha inkhawma zawhna a chhannaah sawiin, project thar kalpui tura pawmpuina pek a nih dawnah state tinte chu Empowered Committee hmaa project chungchang powerpoint presentation pe hmasa tura hriattir an nih thu leh fund hman dan leh pekchhuah dan inhriattirna atan message leh email alert hman tura ruahman a ni, tih a sawi bawk.

DoNER Ministry chuan state sorkar chu project kalpuitu agency te hnenah a hun taka fund pechhuak turte leh project kalpui dan a hun taka sorkar laipui hriattir ṭhin turtein a hriattir. Project nodal officer te chu a hun bi neia project vil ṭhin tura hriattir an ni bawk.

DoNER chuan priority list buatsaih kawnga scientific gap analysis neih hmasak loh avangte bakah priority list leh detailed project report (DPR) thehluh tlai avanga harsatna awmte chu chinfel nan hmalak dan tur a ruahman bawk. Utilisation certificate, quarterly progress report leh inspection report a hun taka thehluh ṭhin loh chu sorkar laipui project kalpui meka harsatna awmte a ni, a ti.