Falcao dah sang ṭhintu Hernan Crespo

Chelsea striker hlui Her­nan Crespo chuan Blues player thar Radamel Falcao chu a dah san ṭhin thu sawiin a khup hliam vanga rei tak a chawlh hnuin ngai a awh leh tawh lo niin a sawi. Colombian striker Falcao hian Manchester United-a beisei a phak loh hnuin Monaco aṭangin loan bawkin Chelsea a zawm a ni. Kum 2000-a Lazio-in Parma aṭanga a hunlaia khaw­vel player manto ber ni tura pound maktaduai 40-a an lak Crespo chuan, "Falcao hi a inhliam hma leh inhliam hnua a dinhmun a inthlau hle. A inhliam hma kha chuan khawvel mihring zinga player ṭha ber a ni a, amah tluk phak player an awm lo. Lionel Messi leh Cristiano Ronaldo erawh mihring pangngai an ni lo a, anni hi chu level hrang daiha mi an ni," tiin a sawi. Serie B club Modena manager ni ta Crespo chuan, "Khatiang ang hliam tawrh tawh hnu kha chuan ngai awh leh hi a harsa tawh ṭhin hle. Falcao tan hian thil a awlsam dawn lo a, Jose hian induhsak vang mai maiin mi a khelhtir ngai lo," tiin hmun chang tam tur chuan Falcao chuan a beih nasat a ngaih tur thu a sawi. Kum 2006 Premier League a Chelsea champion puitu striker chuan, "Falcao an tih tur a neih awmchhun chu mahni inrintawk leh player ropui tak a ni ṭhin tih inhriat thar leh hi a ni. Chu chauh pawh chu Mourinho hmin turin a ṭha tawk em em ang. United-ah khan chuan Van Gaal-a player mamawh ang chi a ni lo hrim hrim. Regular taka inkhelh duh chuan hun ṭha kan neih hi hman thiam a ngai a, Chelsea-ah hian eng nge a an dawn kan hria ang chu," a ti.