Eiruk thubuaiah Arunachal CM hluiin thiam loh chang

Delhi-a CBI special court chuan Arunachal Pradesh Chief Minister hlui P.K. Thungon chu kum 1994-a eiruk thubuaiah thiam loh a chantir.

Special CBI Judge Ajay Kumar Jain chuan he thu hi sawiin, eiruk thubuaiah hian Chief Minister hlui leh midang pathum thiam loh chantir an ni a, court chuan July 27 hian a hrem dan tur a puang ang, a ti.

Prime Minister hlui PV Narasimha Rao kaihhruai sorkarah Minister of State for Urban Development and Employment hna a chelh laiin Thungon hi midang pathumte nen Nagaland irrigation project sum tichingpenah puh a ni a, hemi chungchangah hian thiam loh chantir a ni.

CBI thuchhuak chuan Thungan hi Nagaland-a Irrigation and Flood Control department-a official te nen kum 1993-94 khan dik lo taka sausage wire leiah puh an ni a, Prevention of Corruption Act leh Indian Penal Code (IPC) Section 120B (pawikhawihna thubuai), 419 (mi hminga midang bum), 420 (inbumna), 467 (lehkha dik lo siam), 468 (inbumna atana lehkha dik lo siam) leh section 471 (lehkha siamchawp a dik anga hmang) hmanga thiam loh chantir an ni, a ti.

Court-in eiruk thubuaia thiam loh a chantir mi pathum hi - Tali AO, C Sangit leh Mahesh Maheshwari te an ni a, judicial custody-ah dah rih an ni.

CBI chuan kum 1993-94 khan Planning Commission chuan Naga­land-a minor irrigation project thawm­ṭhat leh tichangtlun nan cheng vaibelchhe hnih a pe a, installment vawi hniha pekchhuah tur a ni, a ti. Planning Commission chuan Nagaland-a Irrigation and Flood Control department Joint Director ngenna angin vaibelchhe khat pekchhuah a ni a, cheng nuai 50 chu sausage wire leina ruahman niin, order nghal a ni, a ti.

Tali Ao chuan Rs 29,99,295 bill thehlutin, Thanu Thungan hmingin Rs nuai 10 demand draft siam tur leh K Konngon Konyak hminga cheng nuai 15 demand draft siam turin a ngen bawk tiin CBI thuchhuak chuan a tarlang a, Irrigation and Flood Control Joint Director Mezakrol chuan demand draft te a pechhuak a ni, a ti.

Thanu Thungan hminga Rs 9,98,500 demand draft siam chu April 25, 1994 khan Vijaya Bank-ah dahluh a ni a, bank account hi Mahesh Maheshwari-a hawn a ni.

CBI chuan Mahesh Maheshwari hian Thanu Thungan anga inchhalin cheng nuai riat chu P K Thungon-a'n Prem Kumar hminga bank account dang a hawnah a dahlut tiin a sawi bawk a, heta pawisa dahluh hi Prem Kumar-a hmingin self cheque-in Rs 1,98,000 lakchhuah a ni, a ti.

CBI thuchhuak chuan May, 1994 khan demand draft pahniha sum lakchhuah cheng nuai riat leh nuai ruk chu Bandang Wapang hminga bank account hawn leh C Sangit-a'n a fapa T Mao hminga bank account a hawnah dahluh leh a ni, a ti.