Gogoi-a'n fund pechhuak thuai turin Jaitley a ngen

Assam Chief Minister Tarun Gogoi chuan 13th Finance Commission-in Assam tana grant in aid a lo ruahmansak tawh, sorkar laipuiin a la pek zawh lohte chu a rang lama pechhuak thuai turin Union Finance Minister Arun Jaitley a ngen.

Union Minister Jai­t­ley hnena lehkha a thawnah Chief Minister Gogoi chuan police housing leh training scheme atan 13th FC-in grant in aid-a cheng vaibelchhe 100 a rua­hmansak aṭang­in Finance Ministry chuan vbc 25 chauh a la pek­chhuah thu a tarlang.

Ministry of Finance-in a ngen angin state sorkar chuan vbc 25 a hmuh aṭang­in utilisation certificate pawh a thehlut tawh tih Go­goi chuan a tarlang bawk.

"Utilisation certi­fi­cate thehluh a nih hnuah Finance Ministry chuan 13th Finance Commission-in a lo ruahman tawh angin police housing leh training scheme atan hian vbc 75 a pekchhuah a la ngai a ni," a ti.

Gogoi chuan 13th FC-in vbc 100 a ruahmansak aṭangin state sorkar chuan Chief Secretary kaih­hruai­na hnuaiah high level meeting neiin, police housing leh training scheme atana sum hman chhuah dan tur ruahmanna pawh a pawm tawh a ni, a ti a, scheme pahnih chu chak taka kalpui mek niin, mahse Finance Ministry aṭanga sum pek dan chuan hna kalpui dan a umpha lo a ni, a ti.