Helte'n NE state panga beih an tum : Security Force

Hmarchhak biala venhim hna thawktu, security force thuchhuak chuan NSCN-K leh ULFA-I helte'n ṭangruala hmarchhak state panga beih an tum thu an sawi.

Assam Rifles (North) Inspector General Lt. Col. Shailesh chuan he thu hi sawiin, intelligence re­port an dawn a nih thu a sawi a, National Socialist Council of Nagaland-Khaplang (NSCN-K) leh United Liberation Front of Asom-Independent (ULFA-I) helte chuan Nagaland, Manipur, Assam leh Arunachal Pradesh-ah pawikhawihna lian tham thlen an tum thu a sawi.

NSCN-K leh ULFA-I helte hian ṭangrualin United National Libera­tion Front of West South East Asia (UNLFWSEA) an din a, thawhho an tum thu an lo puang tawh a ni.

Lt. Col. Shailesh chuan UN­LFWSEA hian Independence Day emaw a hmain state panga-ahte hian pawikhawihna lian tham tak thlen an tum thu intelligence kaltlangin an dawng tih a sawi a, hmarchhak bial mipuite chu fimkhur tur leh inralring renga a awm turin a ngen. Thil rihlelhawmte chu police te hnenah a rang lama thlen zel turin a ngen bawk.

Sipai hotu chuan tun hnai khan puak thei thil hlauhawm tak chu hel pawlte'n Myanmar aṭangin Nagaland-ah an lakluh thu a sawi a, hemi hmang hian Dimapur, Kohima, Wokha, Mokokchung, Mon leh Tuensang te chu an bitum a ni, a ti.

Nagaland-a puak thei thil an man leh military grade anti-tank mine pahnih an man te chuan helte inbuatsaih nasat zia a tilang a ni, a ti.