APSC exam buaina panel-in chhui dawn
Eptu party leh pawl hrang hrangin nasa taka an nawr hnuah Assam Chief Minister Tarun Gogoi chuan Assam Public Service Commission (APSC) in dik lo taka hna lak exam a kalpui thubuai chhui turin inquiry commission din a remti.
"Chief Minister Gogoi chuan APSC buaina chhuitu atan judge chawl tawh kaihhruaina hnuaiah inquiry commission din turin thuchhuah a siam a, commssion hi Commission of Inquiry Act tlawhchhana din a ni ang," tiin sorkar thuchhuak chuan a tarlang.
APSC-in state civil service lakna atan exam a buatsaihah thil dik lo a awm tiin eptu party leh pawl hrang hrangte chuan chhui an duh thu tun hnai khan an lo auchhuahpui tawh a, APSC hna lak dan chu CBI chhuitir an phut a ni.
Assam Congress hruaitu Kirip Chaliha pawhin APSC buaina chu CBI chhuitir ngei a duh thu a lo sawi tawh bawk a, APSC thil tih dik loh dodalnaa a sulsutu, Krishak Mukti Sangram Samiti (KMSS) hotu Akhil Gogoi chu a thlawp thu a sawi bawk.
APSC buaina chungchangah Akhil Gogoi leh KMSS hmeichhe pawl, Gana Mukti Sangram Samiti chuan Gauhati High Court-ah PIL thehlutin, CBI chhuitir an lo ngen tawh a ni.
PIL hi scrutiny committee-ah a la tangkhang a, Gauhati HC-in a la ngaihtuah lo. KMSS PIL chuan APSC-in kum 2013-a civil service exam a buatsaih leh APSC Chairman Rakesh Kumar Paul-a hnathawh dan chhui chian a ngen a ni. KMSS chuan kum 2013-a APSC-in civil service exam a exam chu cancel a, a thara exam buatsaih a phut bawk.