Court-in B’desh minister hlui thubuai siamsak

Dan phal loha India ram a rawn luh avanga May 11-a Me­ghalaya-a an man, Bangladesh mi­nister hlui Salahuddin Ahmed chu Judicial Ma­gis­trate court chuan Foreigners Act, 1946 Section 14 tlawhchhanin, Nilaini khan thubuai a siamsak.

Public prosecutor I.C.Jha chuan he thu hi sawiin, Nilainia hearing neihah Ahmed chuan Shillong-a a thubuai ngaihtuah a duh thu leh dan bawhchiaa court puhna a pawm duh loh thu a sawi. Court chuan July 30 hian hearing a nei leh ang.

Meghalaya police te chuan June 3 khan Fo­reigners Act Section 14 tlawhchhanin Ahmed lak­ah hian court-ah charge-sheet an lo thehlut tawh a, additional deputy com­­missioner judicial B. Mawrie court chuan bail bond-ah Rs nuai hnih chawitirin, bail-a chhuah a phalsak a ni. Bail-a chhuahtir a nih hian thudelhkilh siamsak a ni a, Meghalaya state chhuahsan a phalsak loh bakah East Khasi Hills district SP office-a in report tura tih a ni bawk a, court hmaa inlan zel tura thu tiamtir a ni bawk.

Ahmed hi Khaleda Zia kaihhruai Bangladesh Nationalist Party (BNP) sorkarah kum 2001-06 inkar khan com­mu­nications minister hna a lo chelh tawh a ni.

Ahmed chuan March 10 khan Dhaka aṭangin miin an rubo tih a sawi a, Meghalaya-a a awm dan a hriat loh thu court hmaa a lo sawi tawh a ni.