Tuki-a'n thing phun beihpui a thlak

Arunachal Pradesh Chief Mi­nister Nabam Tuki chuan En­vironment and Forest depart­ment-in thing phun beihpui a huaihawt chu Nilaini khan a hmanpui.

Tuki chuan state chhung ramngaw-in a khuh chin 82% aṭanga 85%-a tihpun tumnaah a kaihhruai sorkar chuan theihtawp chhuaha a beih thu a sawi.

Nilainia beihpui thlaknaah hian Chief Minister bakah MLA leh sorkar officer liante an tel a, school naupang ṭhahnem tak an tel bawk.

Arunachal Pradesh mipui leh forest department te'n ramngaw an humhalh ṭhat avangin 14th Finance Commission-in grant tam zawk a ruahmansak thu Tuki chuan a sawi a, mipui leh forest department official te hmalakna fakawm a tih thu a sawi. Mi zawng zawng chu thingpui beihpui thlaknaah tel vek turin a sawm nghal bawk.

Tuki chuan kum 2000-2001 khan school tinah sorkarin Green Corps (Green Army) a din thu sawiin, chhan hrang hrang vangin tihtawp a ni, a ti a, chhunzawm leh a nih theih nan forest department te chu thil ṭulte bawhzui nghal turin a ngen bawk.

Green Corps hi ramngaw humhalh tura din, zirlaite telna pawl a ni a, an chenna bial leh a chhehvela ramngaw humhalh leh thing phun uar kawnga hmalatu an ni.

Chief Minister Tuki chuan ṭha­laite chu thing phun uar tura fuihin, thing phun leh ramngaw humhalh chu 'hobby'-a nei turin a ngen.

Arunachal Chief Minister chuan Education department chu ramngaw leh nungcha humhalh pawimawhna leh thing phun uar tura zirtirna lam zirlai bua telh tam turin a ngen bawk.

"Arunachal-ah zirlai nuai 1.5 vel kan nei a, thla khat chhungin zirlai pakhatin thing pakhat ṭheuh an phun chuan kum khat chhungah chuan thing tam tak kan phun thei ngei ang," a ti.

Khawpuia pemlut an pun zel avanga ramngaw chereu chho mek zel chu a ngaihmawh thu sawiin Tuki chuan, Itanagar Municipal Council (IMC) chu hemi kawnga ramngaw humhalh dan tur ngaihtuah tura a ngen rualin, Forest department te pawh a ṭul anga IMC ṭanpui turin a ngen bawk.