Imphal-Ukhrul kawngpui dang chat

Manipur-a pem lutte lak aṭanga leilung fate humhalhna tura inner line permit (ILP) system siam phuttu, Joint Committee on Inner Line Permit System (JCILPS) activist te chuan sorkar nawr nan Nilaini aṭangin Imphal-Ukhrul inkalpawhna kawngpui an dang chat.

Leilung fate humhalhna atan dan thar siam tumin Thawhlehni khan state sorkar chuan bill duang tur committee a din tawh a, mahse hetihlai hian JCILPS activist te chuan state sorkar chu bill thar pass thuai tura phutin nawrh an la huaihawt chhunzawm zel thung.

State sorkar chuan bill thar chu thla khat chhungin Manipur Legislative Assembly-ah pass a nih tur thu a sawi.

Bill thar duang tura state sorkarin member panga awmna committee a din-ah hian chairman-ah Law minister Th Debendra Singh ruat a ni a, Special Secretary (Home) M Yaiskul chu convenor niin, Manipur Pollution Control Board Chairman Dr Ng Bijoy, MLA N Biren leh MLA RK Anand te member-a ruat an ni bawk.

Hetihlai hian Congress Legislature Party-in kawngzawhnaa thi, Sapam Robinhood Singh (16) thihna thubuaiah judicial inquiry neih a rel chu state cabinet meeting chuan a pawm bawk.

Robinhood Singh hi Ananda Singh Academy, Nongmeibung-a pawl 11 zirlai a ni a, July 8 khan JCILPS student wing kawng zawhnaah telin, police te nen an innawrnaah, police te kahchhuah tear gas shell-in a deng fuh a, a hnuah damdawi-inah a hliam tuar loin a thi zui nghal a ni. Robinhood Singh-a ruang hi Imphal-a Jawaharlal Nehru Institute of Medical Sciences (JNIMS) damdawi-in mitthi dahna hmunah dah a la ni a, JCILPS chuan state sorkarin leilung fate humhalhna dan thar a pass hma chuan a ruang hlawm a tum loh thu a sawi.

Hemi chungchangah hian Deputy Chief Minister Gaikhangam chuan mitthi chhungte chu a tawrhpui thu a sawi a, JCILPS te chu ruang hlawma vuina hun buatsaih turin a ngen.