Arunachal-in 2015-2016 budget a pass
Arunachal Pradesh Legislative Assembly chuan Thawhlehni khan voice vote hmangin kum 2015-2016 state budget puilting a pass.
Finance porfolio changtu, Chief Minister Nabam Tuki chuan July 15 khan budget hi house-ah a pharh a, July 20 leh 21-a sawi ho a nih hnuah pass a ni.
Tuki chuan budget thuchah a sawiah sorkarin budget kaltlangin ṭhalai hna nei lote hna siamsak a ngaih pawimawh tur thu a sawi a, financial year kal mekah hna nei lo 30,000 te tan hna siamsak an tum thu a sawi.
Kum 2015-16 Arunachal budget-ah hian sorkar sum lakluh (revenue) tura beisei aiin a hman chhuah tur (expenditure) a sang zawk a, hei hi deficit budget tih a ni. Financial year 2015-16 atana deficit budget hi cheng vaibelchhe 514.87 a ni a, revenue lakluh a beisei zat chu vaibelchhe 12,533.62 a ni.
Budget-ah hian social sector lam ngaih pawimawh a ni a, hemi atan hian cheng vbc 1941.19 ruahman a ni. Hei hi kum hmasa budget-a sum ruahman aiin 20%-in a tam. Education-ah vbc 778.25, health sector-ah vbc 346.18 leh water supply-ah vbc 279.38 a ruahman a ni bawk.
Eptu hruaitu, BJP MLA Tamiyo Taga chuan state sorkarin sum lamah harsatna a tawh avangin budget-a hmachhawpte ṭha taka tihpuitlin a nih theih financial discipline leh good governance a pawimawh thu a sawi a, Chief Minister chu schemes kalpui mekte a chatlak loh nan budget-ah sum dah turin a ngen bawk.
Budget sawihonaa tel MLA Japu Deru chuan state sorkar chu education sector-a infrastructure hmasawnna lam ngai pawimawh turin a ngen bawk.
MLA Lombo Tayeng pawhin 2015-2016 state budget chu mipuite tan a ni, tiin agriculture lama thil tharchhuahte hralh nan Chief Minister chu marketing facility siamna tur bawhzui turin a ngen.
Congress thupuangtu, MLA Bamang Felix chuan eptu hruaitu Taga chu state sorkar thawhpui tura sawmin, team Arunachal-ah tel turin a sawm a, hetihlai hian MLA Mohesh Chai chuan state chhunga sikserh natna chi khat (dengue) leng mek do let nan budget aṭanga sum ruahman tura a ngen bakah health sector lam ngaipawimawh turin a ngen bawk.