CM Ibobi-a'n mobile app a tlangzarh

Manipur Chief Minister O Ibobi Singh chuan hmarchhak mite venhimna atana hman tur, mobile application, 'NE Citizen Security Management System' tih chu Thawhlehni khan a tlangzarh.

He mobile software hi hmarchhak mite venhimna chungchang zirchiang tura nikum February-a din, Bezbaruah Com­mittee-in a report-a a rawt anga siam a ni.

Mobile application hi a thlawna download theih a ni ang, a hmangtute chuan awlsam zawkin police hnenah application hmangin complaint an thehlut thei dawn a ni. Application hi video, photo, audio leh text hman theihna tura ruahman a ni a, harsatna tawkte chuan mobile application hmang hian police-te an hriattir thei dawn a, tracking feature dah tel a nih avangin a awmna hmunte chu awlsam takin chhui chhuah theih a ni bawk ang.

Hmarchhak mite venhimna chung­changah Bezbaruah Committee rawtna angin Manipur sorkar chuan Delhi-a chi inthliarna tuarte dan lama ṭanpui turin advocate panel a din tawh bawk a, hemi chungchang pawh hi mobile software-ah hian tarlan a ni.