Manipur ILPS movement: Zirlai thihnaah judiciary inquiry nei dawn

Manipur-a inner line permit system kalpui phuttu, Joint Committee on Inner Line Permit Sys­tem (JCILPS)-in July 8-a kawngzawh a huaihawt ṭuma police te nen an innawrnaa pawl 11 zirlai thi, Sapam Ro­bin­hood Singh thihna thu­buaiah state sorkarin judicial inquiry a neihtir dawn.

Manipur Deputy Chief Minister Gai­khangam chuan he thu hi Thawhlehni khan a sawi a, Thawhṭanni tlaia Congress Legislative Party meeting neihah thutlukna siam a ni, a ti.

Manipur home port­folio changtu, Gai­khan­gam chuan all political party mee­ting-in thla khat chhunga bill thar house-a pass a rawt chu CLP mee­ting chuan a pawm thu a sawi.

Chief Minister Ibobi Singh kaihhruaina hnuaia July 16-a all political party neihah mee­ting chuan Manipur assembly-a thla khat chhunga leilung fate humhalhna tur bill thar pass a rel a, hemi bawhzui tur hian draft committee din a rel bawk.

Manipur sorkar chuan dan thar siam phuta nawrh huaihawt mek JCILPS chu nawrh titawp a, dan thar buatsaihnaa state sorkar thawhpui turin a sawm nawn leh a, an thil phut puitlin nan state sorkar chuan theihtawp a chhuah mek a ni, a ti.