NLA deputy speaker-ah Imtikumzuk

Congress MLA Imtikumzuk chu Nagaland Legislative Assembly (NLA) vawi 12-na deputy speaker-ah thlan a ni.

NLA budget session Thawhlehnia ṭanah deputy speaker thlanna hi neih nghal a ni a, NLA speaker Chotisuh Sazo chuan Imtikumzuk chauh chu deputy speaker atana hming pe lut a ni, hei vang hian lungrual taka thlan a ni, a ti.

Chief Minister T.R. Zeliang chuan Imti­kumzuk chu lungrual taka deputy speaker atana thlan a nih avangin lawmawm a tih thu leh a lawmpui thu a sawi a, hun lo kal zel turah house a rorelna felfai tak an neih theih phah zel a beisei thu a sawi.

"NLA 12-na hi eptu party awm lohna leh part zawng zawng ṭangruala sorkarna a ni a, mi tam takin democracy kalphung anga rorelna kalpui theih loh an ring maithei, mahse MLA zawng zawngte'n lungrual takin Nage political issue chinfel nan hna kan thawh theih phah dawn zawk a ni," tiin Chief Minister Zeliang chuan a sawi.

Hetihlai hian Congress MLA Im­tikumzuk-a deputy speaker atana thlannaah hian BJP MLA pali te chuan vote thlak loin, house an chhuahsan.

Chief Minister Zeliang-a kaihhruai De­mocratic Alliance of Nagaland- III (DAN-III) sorkarah hian NPF, Congress, JDU, BJP leh independent MLA te an tel vek a ni.