SC-in NRC buaipui tur judge hlui telna panel a din

Supreme Court chuan Assam-a National Register of Citizens (NRC) update kalpui mek felfai zawka kalpui a nih theih nan a enpui turin judge hlui pathum awmna panel a din.

India rama dan phal loha pemlut, mahse an fate India-a piang leh seilian ni si, India khua leh tuia pawm lohte'n electoral roll-a telh an nih loh avanga Citizenship Amendment Act Section 3A khing a, complaint an thehluh chu Supreme Court chuan Constitution Bench ngaihtuah turin a dah bawk.

Justice Ranjan Gogoi leh Justice Rohington F Nariman te awmna SC Division Bench chuan NRC update chung­changa complaint lutte chu Thawhlehni khan an ngaihtuah leh a, India khua leh tuia pawm tur chin bithliahah March 24, 1971 pawm a ni a, kum 2014 electoral roll chu NRC update-naah additional do­cu­ment-a hman a remti bawk.

Barak Valley Human Rights Society chuan tun hnai khan SC-ah hian petition thehlutin kum 2014 electoral roll chu NRC update-a additional docu­ment atana hman an ngen a ni.

Supreme Court chuan judge hlui pathum telna panel a dinah hian Jammu and Kashmir High Court judge hlui Aftab Hussain Saikia, judge hlui B Biswas leh JN Choudhury te an tel a, Assam-a NRC update neih meka harsatna awmte chinfel hna an thawk ang. Panel te a ṭul anga pui turin Assam sorkarin member secretary a ruatsak ang.

NRC update-a harsatna neite chuan panel hnenah hian an thlen ang a, anni hian Gauhati High Court emaw Supreme Court-ah an lo thlensak ṭhin dawn a ni.