Meghalaya: UDP MLA ten New Shillong Township-ah Metro Train Service turin sorkar ngen

Meghalaya New Shillong Township (NST) chu efficient hub-a hruai luh tumin UDP MLA, Lahkmen Rymbui-a'n sorkar chu metro train service kalpui turin a ngen. He project lian tak hi helai biala lirthei tlan tam lutuk tihziaawmna tura tih a ni.

NEIGRIHMS, Mawpdang, leh New Secretariat-te thlunzawm thei tur metro line siam rawtna chu, khawvel changkanna hmanga khawpui chhung tih hmasawn a nih theih nana rawt anih thu Rymbui chuan a sawi.

Rymbui chuan sorkarin NST-a Rs vbc 400 invest a tum chu a fak hle a, mipa leh hmeichhe tan sorkar college leh school siam a ṭul thu a sawi bawk.

Mawlyngngad aṭanga NEIGRIHMS lam panna kawng inkalpawhna siam tura thutlukna siam chu lawmawm a tih thu a sawi bawk a, International ramri chungchangah Rymbui chuan, Chief Minister-in India sorkar hnena sum dil tura a in tiam chu lawmawm a tih thu a sawi. International ramri atan sorkar programme aṭanga sum ruahman a rawt bawk.

Hei bakah hian Rymbui chuan Manners leh Lynthong hnamte’n Forest department hnenah ram acre 35 an pe thei dawn tih sawiin, heihi tourism leh forest department te nen thawhhona ṭha tak neia hmalak tum a ni bawk. Thangkharang Park, Shora-a thil mawi tak takte leh hmun nuam tak takte chu khualzinte hiptu ṭha tak anih thu sawiin, he hmalakna kaltlang hian nasa lehzualin khualzinte hip a beisei thu a sawi bawk.

Hmalakna hian Mawlyngngad leh NEIGRIHMS huam chhung a tih chhangtlun dawn bakah infrstructure lama hmasawnna a thlen thei dawn bawk.