Assam : Sattelite kapchhuak dawn

Assam sorkar chuan Thawhṭanni, March 10 khan satellite a neih tur thu a puang a, socio-economic project pawimawh tak tak kalpuina tur data khawlkhawmna a pui dawn a, hei bakah hian ramri pawh a vil reng dawn a ni. He thu hi finance minister Ajanta Neog chuan state budget 2025-26 neih chhung khan a puang.

Chief minister Himanta Biswa Sarma chuan Assam chu ram chhunga satellite nei hmasa ber state an nih tur thu sawiin, Department of Space, Government of India, IN-SPACe (Indian National Space Promotion and Authorization Centre) nen ṭangkawpin, socio-economic project pawimawh tak tak kalpui dan tur data, rintlak taka hman a nih theih nan anmahni satellite, ASSAMSAT din an duh thu Neog chuan budget-a a thuchahah a sawi.

Satellite hian agricul­ture, chhiatrupna laka invenna, infrastructure tihchangtlunna leh ramri venhimna enkawlna leh police hnathawhna atana service bik pekna kawngah a pui dawn bawk a ni, a ti. State hrang hranga zirlai te suangtuahna a tihlawhtling dawn a, INSPACe leh ISRO te puihnain experimental satellite siamnaah an tel dawn a ni, tiin a sawi. CM Sarma press conference-ah thusawiin, satellite an neih chuan ramdang mi, dan loa luh tum an awm leh awm loh a hriattir dawn a, tuilian lo thleng tur chungchangah hriattirna a pe hmasa thei a, loneitute hlawkna tur weather report-ah a pui thei bawk, a ti.