NE-ah Assam-ah lirthei chesual tam ber Lirthei chetsualna M'laya-ah pung chak ber

Assam state chu hmarchhak biala lirthei chetsual avanga thihna thlen tamna ber a ni tih National Crime Records Bureau (NCRB) chuan a tarlang a, Meghalaya chu lirthei chesual pun chakna ber a ni, a ti.

NCRB-in 'Accidental Deaths and Suicides in India 2014' report a tihchhuahah kum 2014 khan hmarchhak bialah lirthei chesual 9,885 a awm thu a tarlang a, heng zinga 7,825 hi Assam a thleng niin, hmarchhak bialah a thleng tam ber a ni. Hmarchhak state danga lirthei chesual awm zat chu - Meghalaya 301, Tripura 716, Mizoram 95, Manipur 735, Nagaland 39, Arunachal Pradesh 112 leh Sikkim 62 te an ni. NCRB report chuan lirthei chesual 9,885-ah hian mitthi 4,037 an awm thu a tarlang bawk a, heng zinga 3,212 hi Assam-a thleng a ni, a ti.

Report chuan Meghalaya-ah lirthei chetsualna a pun chak ber thu a tarlang bawk a, kum 2013-a lirthei chesual 194 aṭangin kum 2014-ah chuan 301-ah a pun thu a tarlang. A punna zat hi 55.2% a ni.

Hmarchhak state zingah kum 2014 khan Assam-ah accidental death a tam ber tih report chuan a tarlang bawk a, hetihlai hian Manipur-ah chuan khuarel chhiatna (natural accident) vanga thihna thleng a awm lo thung.

Sikkim-ah chuan kum 2014 khan accidental death 8,875 thlengin, heng zinga 6,623 hi unnatural accident a ni a, 530 chu khuarel chhiatna (natural accident) niin, 1,722 chu chhan dang vanga thleng a ni.

India ram pumah chetsualna (accidental death) avanga thi 4,51,757 an awm thu a tarlang a, kum 2013-a thihna thleng aiin 12%-in a sang zawk.

Kum 2013 khan chetsualna (accidental death) avanga thi 4,00,517 an awm a, kum 2014 khan darkar tinah accident avanga thi 52 awm anga chhut a ni.

Kum 2014 vek hian darkar tinah khuarel chhiatna avanga thi pahnih an awm anga chhut a ni bawk. Report chuan kum 2014 khan khuarel chhiatna ni lo, chetsualna (unnatural accidents) avanga thi darkar tinah mi 36 dawn an awm thu a tarlang bawk.

Khuarel chhiatna avanga thihna thlen chhan hi tuilian, leimin, lirnhing, ṭek tla leh nat­na hrileng te an ni a, chet­sual­na pangngai (unnatural accident) hi lirthei chesual, thlawhtheihna chesual, tui tla, in chhawng sang aṭanga tla, puipunnaa chil hlum leh ruihtheih thil avanga thihna thlengte an ni.