Hmarchhak-ah eirukna a hluar: Parrikar

Defence Minister Manohar Parrikar chuan Goa chhim lam Margao khuaa BJP member lak beihpui thlaknaah hmar­chhak bialah chuan eirukna a hluar thu a sawi.

"Hmarchhak bialah eiruk a hluar hle a, kawng­pui sial tawh anga tar­lanah a taka kawngpui hmuh tur awm lote a awm ṭhin a ni. A siamna tur pawisa chu a chin hriat lohin a bo ṭhin a ni," a ti.

All India Congress Committee (AICC)-in hmarchhak bial en­kawltu atana a ruat, Goa Congress president Luizinho Faleiro chu ṭawngkama beiin, Parri­kar chuan eirukna nasa tak enliam thei te chauh chu hmarchhak bial enkawltu atana dah ṭhin an ni, a ti.

"Hmarchhak bial aṭanga an rawn let hnuah hmar­chhak tana an thil­tihte in la zawt chhin dawn nia," tiin Parrikar chuan a sawi bawk.