ULFA (I)-in Hindi ṭawng hman pawl 2 a khap

United Liberation Front of Assam (Independent) hel pawlte chuan July 14 zana Assam Tinsukia district-a Hindi ṭawng hmang sumdawng pa pakhat leh a fanu an kahhlum hnuah anmahni dodaltu Hindi ṭawng hmangte pawl pahnih, All Assam Bhojpuri Parishad leh All Assam Bhojpuri Yuba Chatra Parishad chu a khap thu a puang.

ULFA (I) chuan a thuchhuah a siamah, pawl pahnihte hi dan phal loha kal leh pawl ṭangkai loah a puh a, Bhojpuri mi Assam-a chengte chu tualchhung mite hnena inngeih tlang taka awm tura a duh thu leh heng pawl pahnihah hian in­hnamhnawih lo turin a ngen bawk.

ULFA(I) commander-in-chief Paresh Barua chuan a hmain heng pawl pahnihte hi ngaihdam dil turin a lo phut tawh bawk a, Tinsukia district-a thihna thlengah an pawlin a mawh an phur loh thu a sawi.

Hetihlai hian Chief Minister Tarun Gogoi leh Assam Police DG chuan pawikhawihnaah ULFA (I) te chu a mawhphurtu ngei an ni, an ti.

July 14 zana Hindi ṭawng hmang sumdawng pa pakhat leh a fanu thihna avanga lungawi loh lantirnaah pawl hnihte hi hmalatu an ni a, hei vang hian ULFA (I) chuan a khap a ni.