Gogoi-a'n water project-a thamna chhui chiantir dawn
United States New Jersey-a inkhuar, construction management firm-in Guwahati-a water supply scheme hnuaia project lian a thawh theihna atan official-te thamna a pe nia sawi chu Assam Chief Minister Tarun Gogoi chuan chhui chiantir a tum.
Hetihlai hian Union Sport Minister, Assam MP Sarbananda Sonowal chuan thamna chungchangah Central Bureau of Investigation (CBI) chauhin thu dik a hai lan theih a rin thu a sawi.
Chhui chiang turin Chief Minister Gogoi chuan Additional Chief Secretary Subhas Chandra Das a hriattir tawh a, report a thehluh thuai beisei a ni. Eiruk finfiahna a awm a nih chuan state sorkarin CBI a chhuitir a tum thu a sawi bawk.
Union Minister Sonowal chuan thamna chungchang chu India ram pawna company kaihhnawih thil a nih avangin state investigation agency emaw officer te'n thu dik an haihchhuah theih a beisei loh thu leh CBI chauhin a chhui chhuah theih a rin thu a sawi. CBI chu India ram Interpol nodal agency a nih thu sawiin Sonowal chuan thubuai chu state sorkarin a rang lamin CBI kutah hlan nghal se a duh thu a sawi.
American company, Louis Berger official te chuan Assam leh Goa-a contract an hmuh theih nan thamna an pek thu hi New Jersey court-ah an pawm tawh a ni.
Assam-a project hi Greater Guwahati Water Supply Project niin, Guwahati Metropolitan Development Authority (GMDA)-in Japan International Cooperation aṭanga fund a dawn hmangin a ruahman a ni a, Louis Berger company hi consultant-a hman an ni. Project kalpui nan hian Japan International Cooperation chuan vaibelchhe 1,500 a ruahman a ni.