ILP movement-in Manipur-ah nunphung tikhaihlak nasa

Inner line permit (ILP) system phuttu, Joint Committee on Inner Line Permit System (JCILPS)-in ngawrh zawka nawrh huaihawtin, Thawhṭanni khan Imphal-ah bandh a huaihawt leh a, nunphung a tikhaihlak nasa hle.

Greater Imphal leh a chhe­velah dawr khar vek a ni a, public transportation pawh service a awm lo bawk. Veng ṭhenkhatah chuan JCILPS activist te'n sit-in protest neiin leilung fate humhalhna atana dan thar siam an phut.

Hmun ṭhenkhatah chuan activist te hian kawngpui an dangchat bawk a, Chief Minister Ibobi Singh-a lim hal pawlte pawh an awm bawk.

Pawl hrang hrang 40 inzawmkhawm, JCILPS chuan state sorkarin dan thar a siam hma chuan nawrh huaihawt a tum thu puang nawn lehin, Thawhṭanni khan nitin eizawnnaa hnathawhte chawlhsan vek turin a rel a, hemi hnu hian eng chhi-a kawngzawh a huaihawt leh bawk.

Hetihlai hian Deputy Chief Minister Gaikhangam chuan JCILPS te chu nawrh titawp tura state sorkarin a ngen thu leh bill thar siamna atana sorkar thlawp tura a ngen thu a sawi. State sorkar chuan Manipur Regulation of Visitors, Tenants and Migrant Workers’ Bill a hnukkir tawh a, dan thar siam tumin mithiamte a rawn kual mek a ni, a ti.

Gaikhangam chuan Chief Minister Ibobi pawhin JCILPS te lehkha thawnin nawrh titawp tura a ngen tih a sawi bawk. Mahse JCILPS convenor Kh Ratan chuan JCILPS-in sorkar inbiakna neihpui a tum loh thu sawiin, Chief Minister hnen aṭanga lehkha an dawn loh thu a sawi.

JCILPS chuan state sorkar chu JCILPS hotute meeting neihpuia, mipui movement hmehmih tumah a puh bawk.