Manipur : TMC in assembly election neih phut

Trinamool Congress MP, Kalyan Banerjee chuan Thawhlehni khan Manipur-in prime minister hnen aṭangin rorelna dik a hmu lo tih sawiin, state chhungah assembly inthlanpui neih nghal a phut.

Grant, excess grant leh Manipur budget chungchanga supplementary demand sawihonaah telin, Banerjee chuan thla 18 kalta khan sorkar laipuiin Manipur-ah President’s Rule a siam tur a ni a ti a, thla 18 kaltaa Manipur an tlawh thu sawiin, Article 356 hman an phut a, mahse chutih lai chuan Article 356 chu hman niloin, tunah chuan Article 356 chu hman a ni leh si a ni, a ti. Hemi avang hian Banerjee chuan Manipur-ah tualchhung buaina nasa tak chhuakah mi tam tak an thi tawh a, sakhaw biak in leh temple te pawh tihchhiat a nih thu a sawi bawk.

Manipur hian Prime Minister hnen aṭangin rorelna dik a hmu lo a, a rang lama Assembly inthlan neih ni rawh se, tiin a sawi.

Tualchhung buaina nasa tak chhuahna Manipur-ah hian thla hmasaa CM Biren Singh a ban tak hnuah President's rule hi hman a ni.

Banerjee chuan Prime Minister chu Manipur a tlawh lo chu na takin a sawisel a, a awm loh avangin boruak a chhe zual hle niin a sawi.

Manipur tana budget ruahman chungchangah pawh a lungawi loh thu sawiin, state dinhmun siamṭhatna leh hmasawnna atan a tling tawk lo niin a sawi. Hetiang sum tlemte Manipur tana ruahman a ni chu a hriatthiamloh thu leh, Manipur hmasawn nan a beitham hle a ni, a ti bawk.