Meghalaya: KSU leh Meghalaya legislator-te'n MSIPF Act 2024 sawiho

Meghalaya-a Khasi Students Union (KSU) leh Meghalaya sorkar legislator-te chuan Thawhlehni khan meeting pawimawh tak neiin, Meghalaya State Investment Promotion and Facilitation Act (MSIPF) 2024 chungchanga buaina chhuak nasa tak sawi hona an nei.

KSU chu he dan vang hian an lungawi lo hle a, hlih leh an phut bakah, land bank chungchanga thupek awmte leh leilung fate chunga nghawng a neih theih dan tur chungchangah an lungawi loh thu an sawi.

Meghalaya-a invest­ment tihpunna tura siam, MSIPF Act 2024 chuan private investor-te hnena lease pekna tur land bank siam a rawt a ni.

Assembly-a KSU-in nawrh an huaihawt hnuah, Secretariat-ah meeting koh a ni a, meeting-ah hian legislator 60-te kim ṭhapin student union-te nen an in kawm. Legislator-te chuan favang session lo awm turah he dan hi a ṭul anga siamṭhat an tiam.

Mahse, KSU general secretary, Donald V. Thabah chuan rinhlelhna lantirin, ṭawngkam hmanga thutiam piah lamah thu ngelnghet neih a ṭul thu a sawi. Union dinhmun sawi nawn lehin, he dan hi nasa taka siamṭhat a nih loh chuan tihtawp vek a ngai tih a sawi.

Thabah chuan legislator 60, a bik takin tribal community aṭanga lo kalte chu tuna MSIPF Act 2024 hman mek chu hnawl turin a ngen a, siamṭhat tumte hian leilung fate dikna leh chanvo a humhim tawk lo tih a sawi bawk.