Assam CM-in zirlai rethei zual hnenah smartphone pe turin ti

Assam chief minister Sarbananda Sonowal chuan state education department hnenah zirlai rethei zualte chu online class an kal ve theihna turin smartphone sem turin a hriattir. 

Covid-19 leng avangin zirna pangngai  kalpui theih a la ni lo a, online class kalpui a ni. Mahse zirlai rethei zual tam tak chuan smartphone an neih ve loh avangin online class hi an chhim thei lo a ni. Hei vang hian CM chuan zirlai tinten an zirlai an zir chhunzawm vek theihna tura hma la turin education department chu a ti a ni.

CM chuan Janata Bhawan-a health leh education official-te meeting a neihpuinaah hei hi a sawi a ni. 

Hripui a len mek avangin mitinte hriselna ngaihpawimawh a ṭul thu leh zirlaite pawh an immunity system tihchak a ngai tih sawiin, health department hnenah pawh zirlaite hnenah iron leh folic acid tablet sem turin a ngen.

Sonowal chuan state chhunga school ṭhenkhat, emergency Covid care facility atan hmante chu school hawn a nih  hmain damdawi hmanga uluk taka kah thianghlim an ṭul thu a sawi.

Education department chuan November 2 aṭangin Class 6 leh a chunglam te chu class pangngai kal tir tawh a tum. Thawhṭanni, Nilaini leh Zirtawpniah Class 6,7,9 leh 12 te an kal ang a, Thawhlehni, Ningani leh Inrinniah Class 8,10 leh 11 an kal thung ang. Class 1,3, leh 5-te chu kar khatah ni hnih, ni thum leh ni li zel school kaltir tum an ni bawk. Class tinah hian zirlai 25 aia tam ṭum khata awm lo tura tih a ni.