Meghalaya : NEHUTA in VC Shukla NEHU enkawl dan dik lo sawisel

NEHU Teachers’ Association (NEHUTA) chuan vice chancellor Prabha Shankar Shukla chu buaina chhuak mekah university professor-te chu mawhphurtu an nih thu a sawi avangin an sawisel.

NEHUTA president Lakhon Kma chuan Shukla hian NEHU harsatna sutkian theihna tur academic capability a tlachham tih sawiin, he thil chungchangah hian hmaichhana sawiho a phut.

Kma chuan Shukla chu dan eng emaw zat bawhchhiaah a puh a, chung zingah chuan Government of India leave rules, UGC Regulations 2018, leh NEHU Act te pawh a bawhchhia a ni, tiin a sawi.

Shukla-a’n kum thum leh a chanve chhung Vice Chancellor a nih chhungin thil felhlel a awm thu a sawi a, hnathawk atana tling lote chu hna pawimawh tak takah ruatin, Registrar leh Deputy Registrar bakah faculty member pension tawhte pawh a ruat a, hei hian university a enkawl hlawhchham zia a tilang a ni a ti bawk.

Kma chuan Shukla hian agenda thup neiin, region bik aṭangin candidate ruat a, Meghalaya leh Northeastern huamchhung aṭanga local tribal candidate-te a hnawhchhuah thu a sawi bawk. Shukla chuan research a tichaklo a, hnathawktu promotion a ngaihthah vangin NEHU rank a tlahniam niin a sawi bawk a ni.

Shukla chu hna inpek chungchangah duhsak bik neiah a puh bawk a, dan leh hrai bawhchhiaa university dikna tichhetuah a puh a ni.

Kma chuan Shukla chu NEHUTA, NEHUNSA, leh NEHUSU pawlte sawiselna leh rawtna siamṭhatna tur a ngaihthah avanga sawiselin, zirtirtuten Shukla hmuh tumin bei nasa hle mahse, thil hmanhmawhthlak ah pawh appointment an mamawh zel thu a sawi. Hei bakah hian thla ruk chhunga Shillong leh Tura campus-a Pro-VC ruat a lo tiam tawh chu, kum thum hnuah zirlaiten bang tura an nawr thleng pawhin a tihhlawhtlin loh thu Kma chuan a sawi bawk a ni.