Assam: CM in EU Ambassador hmu

Assam chief minister Himanta Biswa Sarma chuan Nilaini, March 12 khan European Union Ambassador to India, Hervé Delphin chu New Delhi-a a chenna inah a hmu. Meeting-ah hian CM Sarma chuan Delphin kaltlangin EU member ram hruaitute chungah lawmthu a sawi a, tun hnaia Guwahati Advantage Assam Summit 2.0 neih zawh tawh chu an thlawp avangin lawmthu a sawi bawk.

He meeting-ah hian Chief Minister chuan an hmalaknate chu lawmawm a tih thu sawiin, EU Ambassador chu Assam sorkar chuan office din awlsamna kawnga an thawhdunna a tizau dawn tih a tiam a, Ministry of External Affairs, India sorkar nen thawhhona ṭha tak an nei dawn a ni.

CM Sarma leh EU Ambassador-te inbiaknaah hian ngaihtuahna fim tak leh rahbi thar ṭha tak chhuah a ni a, sector pawimawh hrang hrang, clean energy, semiconductor, zirna sang zawk, skill development, aromatic leh fragrance industry-a thawhhona awm thei turte an ngaihtuah a ni. Ambassador Delphin chuan CM Sarma hnenah European Union chuan Guwahati-ah EU Program Management Office din a ngaihtuah mek thu hrilhin, chumi chhanna atan CM chuan an hmalakna chu lawm takin a pawmpui a ni.