Zirlai 2 thihna thubuai sorkarin chhui dawn NPMHR-in inrawlh turin UN a ngen

Assam Rifle sipaite'n July 16-a Nagaland Phek district, Phor khuaa zirlai pahnih an kahhlum chu state sorkarin chhuichian a tum thu a tarlang.

Phor khuaa Assam Rifle te silai puakah hian zirlai pahnih an thih bakah midang pathumin hliam an tuar a, hetihlai hian Assam Rifle thuchhuak chuan NSCN (K) helte nena an inkah avanga thihna thleng ta angin a sawi.

Phorü Students Union (PSU) president Mercy Thurr leh general secretary Thuchitu Thupitor chuan Assam Rifle te thuchhuak chu dawt a nih thu leh Assam Rifle convoy aṭanga silai hmehpuah a nih lai hian Phor khuaah NSCN (K) hel an awm loh thu an sawi.

July 16 khan 46th Assam Rifle te chuan Phor khuaah hian NSCN (K) hel nia an sawi mi pahnih ruang an phur lut a, khawtlang mipuite'n mitthi pahnite chu an khaw mi leh sa tiin, an ruang te hi Assam Rifle thuneitute hnenah an dil a, inbiakna an neih laiin Assam Rifle lam hian pawisawilote chungah hian silai an lekchhuak ta a ni.

Nagaland Chief Minister TR Zeliang chuan zirlai pahnih thi chhungte chu a tawrhpui thu sawiin, senior police officer te kaihhruaina hnuaiah chhuichian a nih tur thu a sawi.

Phor khaw mipuite pawh­in pawisawilo thihna kaih­hnawihah Meluri Police station-ah FIR an thehlut bawk.

Hetihlai hian Naga Peoples Movement for Human Rights (NPMHR) chuan sorkar sipaite kuta pawisawi lo, zirlai pahnih thihna chungchangah Universal Declaration of Human Rights tlawh­chhana inrawlh turin United Nations (UN) a ngen.

NPMHR chuan zirlai pahnih chunga thilthleng chu demawm a tih thu leh nunrawn thlak a tih thu a tarlang bawk a, thilthleng chu chetsualna satliah ni loin, Armed Forces Special Powers Act hnuaia sorkar dan siam vanga thleng a ni, a ti.

Kum 1979 khan Phek khua, Bible Hill-ah 14th Assam Rifle sipaite'n Naga naupang pahnih chu anmahni biakna atan Hindi hmang loa sap ṭawng an hman avangin kut an thlak thu leh Indian Army te'n Phor leh Wuzu khuaa mipa puitling zawng zawng man khawmin an sawisa hlum tawh tih NPMHR chuan a tarlang bawk.

NPMHR chuan Indian Army te rawng taka chet dan chungchangah sipaite ṭan zawng leh dik taka India media te'n chanchin an thehdarh ṭhin lo chu pawi a tih thu a tarlang bawk.

Phor khuaa zirlai pahnih an kahhlumte chu Assam Rifle hotute chuan NSCN(K) helte kah­hlum an ni tiin an ṭanhmun ngai­ah an la

ṭang reng a, mahse NPMHR chuan Assam Rifle te'n July 16-a Phor khuaa silai an hmehpuah laiin khaw chhung leh a chhehvelah NSCN (K) hel an awm loh thu a tarlang a, Indian media te chu Phor khua tlawha thu dik hai lang tur leh tu nge pawisawi lote chunga pawikhawihtu dik tak tarlang turin a ngen.

"Tu nge firfiak pawl chu Indian security force te nge, Naga zirlai naupangte?" tiin NPMHR chuan Indian media te chu thu dik haichhuak tura a phut thu a tarlang bawk.

NPMHR chuan sorkar laipuiin AFSPA tlawhchhana Nagaland state pum disturbed area-a a puan chu India-in Naga hnam lakah indo a puang a ni, tih Naga leh khawvel mipuite hriattirna a ni, a ti.