Food Security Act kalpui tum dan sawifiah phut
Sorkar laipui chuan Meghalaya sorkar chu Food Security Act a kalpui hmain kalpui a tum dante sawifiah hmasa turin a hriattir.
State sorkar official chuan he thu hi sawiin kar kalta Inrinni khan sorkar laipui chuan hemi chungchangah hian state sorkar chu hriattirna a pek thu a sawi. Meghalaya sorkarin eng tin nge langtlang takin food security scheme kalpui a tum tih sorkar laipui chuan a hre duh a ni, a ti.
"Kan ruahmanna chu sorkar laipui hriattir tumin kan inbuatsaih mek a, state sorkarin a rang lamin scheme a ṭan thuai ka beisei," tiin a sawi.
Meghalaya-a food scheme kalpuina tura chinfel ngai awmte state cabinet chuan chinfel thuai a tum a, state mipui 21,45,795 chuan scheme hi an chhawr ṭangkai thei dawn a ni, tiin official chuan a sawi bawk.
Food Security scheme kalpuina turah hian a hamṭhatna dawng tur chhungkuate chu ration card thar siamsak an ni anga, hetihlai hian a dawng turte list hi buatsaih mek a ni, a ti.
State sorkar chuan Food Security scheme hnuaiah hian district tinah nodal officer a ruat ang a, mipuite chuan officer hnenah hian an harsatna leh thil dik lo awmte an thlen thei dawn a ni.
Food Security Act hi sorkar laipuiin India ram mipui, 67% te hnena inang tlang taka buhfai, chhangphut leh chaw lam chi thil dang pek a tumna a ni a, mi pakhatin vawi khatah buhfai kg 5 chu cheng khat aṭanga cheng thum zelin a lei thei dawn a ni. He scheme hnuaiah hian wheat (chhangphut) kg khat man chu sorkarion cheng thumah a bithliah a, buhfai kg man cheng hnih a chhiar bawk.
Meghalaya chuan food scheme kalpuina atan thla khatah cheng vaibelchhe 3.28 a mamawh dawn a, heng zinga 25% hi state sorkarin a tum a ngai dawn a ni.