GNLA-in mobile tower tihtawpsakah an vau

Meghalaya police-in Facebook-a an page an tihtawpsak avanga an lung­awi loh lantir nan Garo National Liberation Army (GNLA) helte chuan Garo Hills-a mobile tower tihtawpah an vau.

GNLA thuchhuak chuan an Facebook page kaltlanga mipuite thu pawimawh hrilh an duh thu leh inkawmhona neih an duh thu an tarlang a, hetiang an nih laia police lamin an Facebook page an kharsak chu an lawm loh thu an tarlang bawk.

Meghalaya police te chuan GNLA te chu Facebook page kaltlanga thu dik tawk lo thehdarh ṭhinah an puh a, hei vang hian an page hi tihtawpsak turin Facebook thuneitute hnenah an ngen a, hemi hnu hian tihtawp a ni. GN­LA Facebook page hian July 17 thleng khan zui­tu (follower) 950 a nei hman.

GNLA chanchin hrim hrim hi police te chuan media a tarlan an lo khap tawh bawk.