Arunachal-a Trans Highway project tikhawtlai
Trans-Arunachal Highway (TAH) project hnuaia Lalpur leh Changlang inkara kawngpui kilometre 68-a thui sial tur chu tihkhawtlai a ni tih Arunachal Pradesh PWD Minister Gojen Gadi-a'n a sawi.
Minister Gadi chuan hnathawktu company te chu hna thawh chhunzawm turin thutawp hriattir an nih tawh thu leh a rang lama kawngpui sial hna thawk zo tura hrilh an nih tawh thu a sawi a, sorkar hriattirna chu an zawm lo a nih chuan remna an ziah tawh hnuhkir a nih tur thu a sawi.
TAH project sawihonaa tel, BJP MLA Laisam Simai chuan project thawktu, Mumbai-a Delta SPC Company te chu state sorkarin vawi 12 chuang hna thawh chhunzawm turin a ngen tawh thu leh kum nga a ral tawh thu a sawi a, hei vang hian company hian June thla khan hna a chhunzawm thu leh a chawlhsan leh tawh thu a sawi. SPC company te'n hnathawh an chawlhsan leh tak avang hian vaibelchhe 4.71 chawi tura tih an ni.
TAH project hnuaia Lalpur-Changlang kawngpui sial hna hi kum 2011 khan ṭan tawh a ni a, March 6, 2014-a zawhfel tura ruahman a nih laiin, vawiin thlengin zawhfel a ni lo. March 30, 2015-a zawhfel hman tura ruahmanna thar siam a ni leh a, mahse company hian a hemi hma hian a thawk zo hman chuang lo a ni.
"SPC Company hnenah July 16 khan state sorkar chuan hriattirna hnuhnung ber a pe a, hnathawh an chawlhsan tawh chu chhunzawm leh turin a hriattir a ni. A chhunzawm loh chuan inremna thuthlung kan ziahpui tawh pawh hnuhkir a ni ang," tiin PWD Minister Gadi chuan a sawi.