AFSPA chungchang Home Ministry-in chhang duh lo

Union Home Ministry chuan kumin March 27-a Armed Forces Special Powers Act (AFSPA) tlawhchhana Arunachal Pradesh district pumpui "disturbed area'-a a puan chungchanga Right To Information Act hmanga a ngaihdan zawhna chu a chhang duh lo.

Home Ministry chuan zawhna chhanna chu ram inpumkhatna khawih pawi thei thil a nih avangin a chhan theih loh thu a tarlang.

"Arunachal Pradesh-a Tirap, Changlang leh Longding district bakah district dangte 'disturbed area'-a puan chungchanga a mawhphurtute ngaihdan zawhna chu RTI Act, 2005 Section 8(1)(a) tlawhchhana puanzar theih loh thil a ni," tiin Home Ministry thuchhuak chuan a tarlang.

Commonwealth Human Rights Initiative (CHRI) member Venkatesh Nayak chuan Arunachal Pradesh disturbed area-a puan chungchangah zawhna a siam a ni.

Ministry of Home Affairs joint secretary (NE) Shambu Singh chuan hemi chungchanga March 27-a thuchhuah a siamah Assam ramri biala Arunachal Pradesh district zawng zawngte chu AFSPA, 1958 Section 3 tlawhchhanin "disturbed area"-a puan a ni tih a tarlang a, AFSPA chu kum khat dang pawhsei a ni ang, a ti.

Disturbed area-a district zawng zawng puan hi state sorkar leh mipuiin nasa taka an dodal hnuah sorkar laipui chuan AFSPA chu state puma lekkawh a nih loh thu leh district ṭhenkhatah chauh hun bithliah neia pawhsei a nih thu a sawi.

Hetihlai hian Home Ministry chuan Security Related Expenditure scheme hnuaia hmarchhak state te tana kum 2014- February 1, 2015 inkara fund a pekchhuah zat tarlang tura hmarchhak state te'n a ngenna chu a chipchiarin a tarlang duh lo bawk.

"SRE scheme chu Mizoram leh Sikkim tih lohah chuan hmarchhak state zawng zawngah kalpui a ni a, hemi senso hi RTI Act, 2005 Section 8(1)(a) tlawhchhana puanzar theih loh thil a ni," a ti.