Meghalaya : CM in Assam nen thawhhona ṭha neih phut

Meghalaya chief minister Conrad K Sangma chuan Ningania assembly-a thu a sawinaah, Byrnihat in boruak bawlhhlawh a hmachhawn mek chungchangah ṭhenawm state Assam nen thawhhona ṭha tak neih a phut.

CM Sangma chuan he thu hi IQAir World Air Quality Report 2024 tihchhuah a nih hnuah sawiin, Byrnihat hian cubic meter khatah PM 2.5 concentration average 128.2 microgram a nei tih a tarlang. Meghalaya State Pollution Control Board (MSPCB) data aṭanga lakchhuahah CM Sangma chuan, kum 2024 chhungin kum khatah cubic meter khatah microgram 50.1 ah a tlahniam tih a sawi.

January leh February 2025-a enfiah a nih hnuah, MSPCB chuan industrial unit eng emaw zat chu dan bawhchhiatna avanga khar tura hriattirna a pe a, chung zingah chuan pollution control device hman loh leh emission data thawn chhuah lohte pawh a tel a ni, tiin Chief Minister chuan a sawi bawk. Mahse, Byrnihat (Assam) chuan Central Academy for State Forest Service-a Continuous Ambient Air Quality Monitoring Station-in a report angin boruak quality chu “poor to very poor” tiin a la lantir tho a, hei hian boruak bawlhhlawh thlentu lian ber chu Assam lama industry leh thil dang tih vang a ni thei tih a tilang a ni,” tiin Chief Minister chuan a sawi.

Chief Minister chuan, Assam-a Byrnihat-ah hian red-category industry 20 a awm a, Meghalaya Byrnihat-ah chuan industry panga chauh a awm tih sawiin, Central Pollution Control Board chuan Assam portion chu critically polluted area tiin a sawi bawk. CM Sangma chuan state pahnihte hian thawhhona ṭha tak neia boruak bawlhhlawh hmachhawn turin dan anga ruahmanna awmsa an kalpui dawn tih a sawi bawk.