Assam: CM in polytechnic zirtirtute harsatna sutkian a tiam

All Assam Students Union (AASU) chuan, chief minister Himanta Biswa Sarma chu state chhunga polytechnic zirtirtuten an hnaa harsatna chingfel tur leh a rang lama hmalak sak turin an ngen a, hemi chungchangah hian CM Sarma chuan Ningani khan Guwahati-a press conference a neihnaah thil thlengte a thlirlet hnuin, an harsatna tawhte chinfel sak turin a tiam. CM Sarma chuan Polytechnic thar pathum Hajo, Majuli leh Tingkhong-ah din a ni dawn tih sawiin, a tlingte chu hna ruak awm zat a zirin heng polytechnic tharah hian part-time basis a lak theih an nih thu a sawi a, amaherawhchu he hna atan hian exam an hmachhawn a ngai dawn thung a ni.

Chief Minister hnena lehkha an thawnah, AASU chuan kum tam tak chhung polytechnic institution hrang hranga thawk tawhte chu ban an nih thu an sawi a, part-time zirtirtu te hnathawh dan mumal zawka kalpui a nih theih nan humanitarian approach kalpui an phut a ni.

AASU president Utpal Sarma leh general secretary Samiran Phukan te chuan heng zirtirtute hian polytechnic institution-te zirna leh enkawlna kawngah an thawkhlawk hle tih sawiin, langtlang taka faculty nghet lak chu lawmawm a tih rualin, zirlai pawl chuan hun rei tak chhung part-time zirtirtu hna thawk tawhte chu an hmalam hun atana ruahmanna awm loa ban chu thil dik lo a nih thu an sawi.

Heng zirtirtu te hi merit leh qualification aṭanga ruat an ni a, a tam zawk chu chhungkaw chawmtu an nih bakah, hna thar dilna atana kum bithliah an pel tawh tih an sawi. Policy diktak awm loa ban an ni chu pawi an tih thu an sawi bawk. Zirlai pawl chuan heng zirtirtu te awmna turin policy bik siam an ngen a, hna aṭanga ban an nih avangin chhungkaw tam takah harsatna a thlen dawn a ni.