Nagaland-ah AR sipaite'n zirlai 2 an kaphlum

Nagaland Phek district, Phor khuaah kar kalta Ningani zan khan Assam Rifle te'n zirlai pahnih an kaphlum a, mi pathumin hliam an tuar.

Assam Rifles te hian July 16 khan NSCN (K) hel nia rin pahnih an kahhlum ruang chu Phor khuaah hian an phur lut a, khaw mipuite chuan mitthi te chu an khaw mi leh sa an nih avangin an kuta ruang chu hlan turin an ngen a, hetia inbiakna an neih lai hian NSCN (K) helte chuan Assam Rifle te hi an lo kap ta niin, Assam Rifle thuchhuak chuan a tarlang.

Mahse NSCN (K) helte'n an lo kap hmasa tia Assam Rifle te'n an sawi hi Pochury Hoho (PH) president Penthu Pochury chuan dawt a ni, a ti a, mitthi ruang chungchanga Assam Rifle leh Phor khaw mipuite inbiak lai hian NSCN (K) hel an awm loh thu a sawi.

Thilthleng mita hmutu, Phorü Students Union (PSU) president Mercy Thurr leh general secretary Thuchitu Thu­pitor chuan 46th Assam Rifle hotu, Major Su­rinder Singh chuan mitthi ruang chu ADC office Meluri-a dah tur a ni a tih avangin Phor khaw mipuite chuan an khuaa ruang dah a, kalsan mai turin an ngen thu an sawi a, hetia inbiakna an neih lai hian Assam Rifle convoy-a lirthei hmasa ber aṭangin silai an hmetpuak a, convoy lirthei hnung lam aṭangin an rawn pawng kah nghal tiin an sawi. PSU chuan AR te'n dawt chiang taka an sawi chu an dem thu an sawi a, inbiakna an neih lai hian thingtlang khaw mi zingah silai keng an awm loh thu an sawi.

Assam Rifle te hian zirlai pahnih thite hi NSCN (K) helte kahhlum tiin an sawi a, hetihlai hian mi pahnih ruang phur convoy hi mipuiin tihluihnain Phor khuaah hian an lo tiding tiin, an sawi bawk.

PSU chuan Assam Rifle te chu Phor khua leh a chhehvel boruak ralmuanna tichhe tuah puhin, zirlai naupang pahnih an kahhlum hnua Assam Rifle sipai tam zawk khua leh a chhehvela an dahte chu mipuite vau zam tumna leh hlauhtir tumna mai a ni, an ti.

Hetihlai hian Naga­land Chief Minister TR Zeliang chuan mitthi chhungte a tawrhpui thu leh pawisawilote thihna thleng chu a dem thu a sawi.

Chief Minister Office chuan thuchhuah a siamah hel pawl emaw sorkar sipaite emaw chu puipunna hmunah silai hmetpuak tawh lo turin a ngen a, Phor khuaa thilthleng chu chhuichian a nih tur thu a tarlang bawk.

Chief Minister thupek angin Nagaland DGP, Police Commissioner leh Home Commissioner chuan Phor khua hi an tlawhin, thil thlen dan an zirchiang nghal a, Chief Minister hnenah report an thehluh thuai beisei a ni.

State Home Minister Y Patton pawhin thilthleng chu a dem thu sawiin, "Assam Rifle te'n zirlai naupang pahnih an kahhlum hian ka rilru a tina hle a, mitthi chhungte ka tawrhpui tak zet a ni," a ti.