NEC-in hmarchhak biala thlai thar tihpun a duh

North Eastern Council (NEC) chuan ei leh bara hmarchhak biala intodelh theih nan agriculture aṭanga thlai thar chhuahte tihpun a duh thu a sawi.

Agriculture and Allied Sector chungchang meeting neih kaihhruaiin, NEC member CK Das chuan he thu hi kar kalta khan Shillong-ah a sawi a, thlai thar chhuah tihpun a duh bakah ran vulh lampang pawh tihchangtlun ṭha a tih thu a sawi bawk.

Meeting-ah hian NEC Secretariat-a senior officer te bakah hmarchhak state pariata, Planning Department senior officer te an tel.

Ran vulh lam ti­changtlun kawngah vawk leh ar vulh tihchangtlun dan turte sawiho a ni a, hmarchhak biala thei leh pangpar chin uar zawk leh zau zawka kalpui dan turte an sawiho bawk.

Das chuan hmarchhak biala agriculture hma­sawnnaa harsatna awmte tarlangin, thlai chi ṭha awm lote, lirthei kawngpui leh rela inkalpawhna changtlung lo te, thlai chin theihna ram tlem lutuk te, lei kal ral nasa te leh thlai chinna leh enkawlna hmanrua ṭha­­lote chu agriculture ṭhan­mawhbawk a ni, a ti.

"Thlai thar zawr­chhuahna mumal lote pawh harsatna lian tak pakhat a ni a, hetihlai hian NEC hmalakna hnuaiah sangha, artui leh ran vulh dangte hlawhtling taka kalpui a ni a, a lawmawm hle," tiin Das chuan a sawi bawk.