Ni 3 ral hmaa chhuichiang turin Manipur sorkar a hriattir
Manipur-a inner line permit (ILP) system kalpui phuttu, Joint Committee on Inner Line Permit System (JCILPS)-in July 8-a kawngzawh a huaihawta zirlai pakhat, police te kuta a thihna thubuai bawhzui tura din, Joint Action Committee (JAC) chuan pawl 11 zirlai, Sapam Robinhood Singh thih dan chu ni thum ral hmaa chhui chiang a, pawikhawihtute hrem nghal turin Manipur sorkar a hriattir.
JAC chairman Hemchand Singh chuan ni thum chhunga state sorkarin a bawhzui lo a nih chuan lian tham zawka nawrh huaihawt an tum thu a sawi.
Singh chuan Sapam Robinhood Singh thih aṭanga ni 11 ral hnuah pawh state sorkarin a thihna thubuai a bawhzui lo chu mak a tih thu leh sorkar a dem thu a sawi a, zirlai naupang thihnaa inhnamhnawih police te chu ni thum ral hmaa an hna aṭanga suspend a phut thu a sawi bawk.
"Kan thil phut hi ni thum ral hmaa state sorkarin a bawhzui lo a nih chuan JAC leh JCILPS student wing ṭangrualin ngawrh takin lungawi lohna lantir kan tum," tiin a sawi.
Sapam Robinhood Singh a ruang hi hlawm lohin JNIMS damdawi-in mitthi dahnaah a la awm a, JCILPS chuan state sorkarin leilung fate humhalhna tur bill thar a pass hma chuan ruang chu hlawm an tum loh thu a tarlang.
Hetihlai hian Manipur Home portfolio changtu, Deputy Chief Minister Gaikhangam chuan zirlai thihna chu senior police officer kaihhruaina hnuaiah chhui chian mek a ni, a ti.
JCILPS chuan July 20 aṭangin ngawrh zawka nawrh huaihawt a tum thu kar kalta Inrinni khan a puang leh bawk.
Manipur sorkar pawhin JCILPS phut anga, a hnuhkir tak Manipur Regulation of Visitors, Tenants and Migrant Workers Bill, 2015 thlakna tur ngaihtuahin, dan hremi te thurawn a lak kual mek thu a tarlang bawk. Chief Minister Ibobi Singh chuan hemi chungchangah hian July 17 khan Bar Council of India, Bar Council of Manipur High Court leh All Manipur Bar Association te meeting a neihpui a, leilung fate humhalhna tur dan thar siam kawngah an ṭanpuina a ngen nghal bawk.