NRC update hun tiam hmain zo hman dawn lo

Assam-a National Register of Citizens (NRC) update kalpui mekah 20% velin telh tura dilna an thehlut tawh a, hetihlai hian dilna thehluh hun tawp chu July 31 a nih avangin an peihfel hman rin a ni lo.

NRC update hi Supreme Court kaih­hruaina hnuaiah neih a ni a, hun tiam hi pawhsei a remti dawn em hriat a ni lo.

Sorkar official chuan Assam-ah chhungkaw nuai 65 chuang an awm thu sawiin, tun thlengin chhungkaw nuai 12 vel chauh NRC-a telh dilna an thehluh thu a sawi. Khaw ṭhenkhatah chuan NRC-a inziaklut tura mipui an phur viau laiin, khaw ṭhenkhatah chuan an phur lutuk hlawm lo tiin a sawi bawk. Barpeta district-ah chuan 40% chuangin dilna an thehlut tawh a, Dhubri district-ah pawh an inziaklut an ṭhahnem tawh hle. Mahse Guwahati-ah erawh chuan dilna thehlut an tlem hle.

NRC dilna hun hi sorkarin a thuin a pawhsei theih loh thu official chuan a sawi bawk a, mipuite hnena dilna form semchhuah dawn pawhin Registrar General of India (RGI) phalna neih hmasak a ngai a ni, a ti.

Mipuiin NRC update an ngaihpawimawha online aṭanga inziahluh an uar lehzual nan advertisement pawh chhuah a nih thu official chuan a sawi bawk a, Assam-a tuilian leh bandh neih fo chuan NRC update kalpuina a tihmuan thu a sawi bawk.

NRC update thawh hnihnaah hian chenna-in tinah luta khua leh tui an nih leh nih loh finfiah a ngai dawn a, hemi atan hian thla thum a awh rin a ni.