Naga mipuite'n pawngsualtua rinhlelh chil hlum
Kumin chhunga a vawi hnihna atan Nagaland Dimapur district, Khekiho khaw mipuite chuan Thawhlehni khan pawngsualtua rinhlelh an chil hlum leh.
Kumin March 5 khan pawngsualtua rinhlelh pakhat chu Dimapur-ah mipuite'n jail aṭanga hnuk chhuakin, kawng an zawhpui a, kawng laka an sawisakna hliam tuar loin a thi zui a, a ruang hi mipui hmuh theih turin an tar a ni.
Dimapur-a Additional Deputy Commissioner of Police Shouka Kakheto chuan Khekiho khuaa thilthleng tarlangin, pawngsualtua rinhlelh Hussain Ali (35) chuan hmeichhe naupang kumtlinglo pakhat chu a chenna-inah pawn chhuak thei loa khung hrangin a pawngsual ṭhin a ti.
Hmeichhe naupang hi July 11 aṭangin a chhungte'n a awmna chin an hriat loh avangin khawtlang mipuiin an zawng nghal a, July 14 khan Lhotavi khuaa Hussain Ali chenna-inah pawn chhuak thei loa awmin, an va hmu a ni. Mipui thinrim chuan Hussain hi an chil nghal a, mahse khawtlanga upate chuan va chhanin, Dhansiripar police outpost-ah an hruai a, kawng lakah a hliam tuar loin a thi zui nghal.