Land Acquisation Bill-a rawtna thar Sarkar-a'n dodal

Sorkar laipuia BJP kaih­hruai NDA sorkarin Right to Fair Compensation and Transparency in Land Acquisa­tion, Rehabi­litation and Re­settlement Act-2013 siamṭhat (amend) tuma rawt­na thar a siam chu Tripura Chief Minister Manik Sarkar-a'n a dodal.

Sarkar chuan of NITI Aayog Governing Council meeting vawi hnihna Nilainia New Delhi-a neihah Land Bill-a rawtna thar chu a pawm loh thu a sawi a, Tripura chuan thlai leh thil dang chinna, agriculture atana hman chi ram a neih tam loh thu leh agriculture atana ram an neihte chu thil danga hman theih a nih loh thu a sawi.

BJP sorkarin bill siamṭhat­na atana rawtna a siamte chu sawiselin, Sarkar chuan "Project lian tham kalpui dawnin bill rawtna thar chuan a ram neitute leh project-in a nghawng theih tur mipuite phalna la kher loa project kaltlangpui a phal a, mahse Land Acquisition chu a nghawng tuar theitu mipuite phalna lak hnuah a nghawng tlem thei ang bera kalpui chi-ah kan ngai a ni," a ti.

Tripura Chief Minister chuan vantlang mipuite chhawr theih tur, project lian tham kalpuina atana mimal ram lak a nih dawnah khawtlang hruaitute leh village council te thurawn lak hmasak a duh thu a sawi a, hei bakah hian project-in a nghawng theih dan tur zirchianna, social impact assessment neih hmasak ngei a duh thu a sawi bawk.

Project kalpuina atan awlsam taka ram lak phal a nih chuan thlai chi hrang hrang chinna leh thlai tui pekna changtlung tak awm tawhna leilet te lak a ni ang a, hei hian Food security Act kalpui tur pawh a nghawng ngei ang, tiin Sarkar chuan a sawi.

Sorkar laipuiin industry tichangtlun tum a industry tam zawk hawn belh a tum chung­changah, Sarkar chuan thlai chinna ram tam tak industry dinna atana hman a nih chuan agriculture-in a tawrh phah tur thu a sawi a, mi tam tak chu ram nei loa an awm theih thu leh India ram food security-in a tawrh phah a hlauhthawn thu a sawi bawk.