Assam: Congress MP in FIR thehlut

Assam Congress MP Rakibul Hussain chuan social media lamah vawi tam tak thaha vau a tawh hnuah, New Delhi aṭangin Dhubri Sadar Police Station-ah FIR a thehlut. He complaint hi Thawhṭanni khan Dhubri district, Sonakhuli khuaa cheng Mostofa Ali fapa, Ansar Ali lakah thehluh a ni. Assam Chief Minister Himanta Biswa Sarma chuan hemi chungchang hi a official X-ah post-in, dan anga hmalak a nih tur thu a tiam.

Hussain chuan sorkar laka a lungawi loh thu sawiin, a hmaa pawikhawihna thlenga inhnamhnawih misualte sorkarin a hum tlat tih a sawi. Amah beitute chu anticipatory bail pek niin zalen takin an awm a, tunah chuan thaha vauna hial a dawn tawh thu a sawi bawk.

Lok Sabha MP hian hemi chungchang hi Lok Sabha Speaker hnenah a hriattir tawh tih sawiin, Delhi aṭangin email hmangin Dhubri Sadar Police Station-ah official-in FIR a thehlut tawh tih a sawi.

Hussain chuan, January 4, 2025-a vauna a tawh hmasak ber chu Facebook Live session-ah niin Ali hian, 'Dhubri-ah hian i dam khaw chhuak dawn lo, kan that che anga i ruang chu kawngpuiah ui ei turin kan dah ang' tia comment-a puh a ni. March 16 khan Ali chuan an beihna hmasa zawk chu pumpelh mahse, tun ṭumah chuan thah a nih ngei tur thu a ziak nia sawi a ni bawk.

February 2025 khan Hussain hi Gunabari-a Congress workers meeting-a tel tura a kal laiin, Rupahihat Natun Bazar-ah misualin an lo bei tawh bawk a ni. Report-a a lan danin, puan duma hmai khuh te'n MP hi beiin, a bodyguard pawh an bei tel bawk. He thil thlen hnu hian Assam Police-te chuan February 20 khan Congress MP Rakibul Hussain beihnaa inhnamhnawiha rinhlelh mi 10 an man a ni.