Arunachal Pradesh: Sorkarin Mass Communication course buatsaih

Arunachal Pradesh sorkar chuan Dera Natung Government College (DNGC), Itanagar, leh Jawaharlal Nehru College (JNC), Pasighat-ah undergraduate level Mass Communication course kalpui a remti.

Chief minister Pema Khandu chuan Thawhlehni khan social media-ah he thutlukna hi puangin, state chhunga media zirna lama hmasawnna lian tak a nih thu a sawi. He hmalakna hi a hlawhtlin theihna tura hma latu Core Committee for Communication (C3) leh Rajiv Gandhi University Students Union (RGUSU) te chu a fak hle.

He hmalakna hian journalist, film siamtu, leh public relation professional ni duhte tan hun remchang a siam sak dawn a, hei hian Arunachal Pradesh-a media industry chak zawk siamna kawng a hawnsak dawn a ni.

Arunachal Pradesh sorkarin thla 6 chhungin Electronic Media Policy kalpui a tiam (sub head)

Tun thla tir lam khan Arunachal Pradesh Electronic Media Advertisement Policy 2020 kalpui loh chungchang chu nimin khan Legislative Assembly-ah Keyi Panyor district-a Yachuli Assembly constituency aṭanga NCP MLA thlan thar Toko Tatung-a'n a lo sawi tawh a ni.

Budget Session neih mekah Tatung chuan, Arunachal Pradesh Legislative Assembly Session vawi lina-ah zawhna siamin, state chhunga electronic leh digital media house-te advertisement pek dan rintlak awm a ngaih thu a sawi.

Hemi chungchangah hian Minister for Information and Public Relations (IPR) Nyato Dukam chuan thla ruk chhunga kalpui a nih tur thu tiamin, thil ngaihtuah tur awmte chu pawmin, media house-te zingah advertisement dik taka sem chhuah a nih theih nan sorkar a inpeih thu a sawi bawk.