Tuki-a'n 2015-16 state budget a pharh

Arunachal Pradesh Chief Minister Nabam Tuki chuan Nilaini khan finan­cial year 2015-16 atana state budget puitling a pharh.

Kum 2015-16 Arunachal budget-ah hian sorkar sum lakluh (revenue) tura beisei aiin a hman chhuah tur (expenditure) a sang zawk a, hei hi deficit budget tih a ni. Financial year 2015-16 atana deficit budget hi cheng vaibelchhe 514.87 a ni.

Finance portfolio changtu Tuki chuan state hmasawnna atan a kaihhruai sorkarin thil pathum a dah pawimawh bik tih a sawi a, chungte chu- i) health, education leh skill, ii) communication, airways, road and electricity (CARE) leh, iii) minerals, agriculture & allied sectors, tourism and hydropower (MATH) te an ni, a ti.

Budget-ah hian social sector atan cheng vbc 1941.19 dah a rawt thu a sawi bawk a, hei hi kum hmasa budget-a sum ruahman aiin 20%-in a tam.

Tuki chuan education-ah vbc 778.25, health sector-ah vbc 346.18 leh water supply-ah vbc 279.38 a ruahman thu a sawi bawk.

Kumina budget-a a thil ngaihpawi­mawh chu Arunachal ṭhalai hna neilote'n eizawnna bul an ṭan theihna atana hna thawh tur siamsak a ni, tiin Arunachal Chief Minister chuan budget thuchah a sawiah a tarlang a, kumin chhungin hna 30,000 siam a rawt nghal.

Chief Minister Tuki chuan 12th Five Year Plan tawp hmain hna nei lo mi nuai khat chu hna siamsak tumin a bei mek tih a sawi bawk.

Health sector lama rawtna thar a tarlanah district hospital tinah damdawi man tlawm, generic drug store hawn vek an tum thu a sawi a, Chief Minister Universal Health Insurance Scheme atan budget-ah cheng vbc 30 a dah bawk.

SSA, MDM, RUSA leh Centrally Sponsored Schemes (CSS) dang kalpui mekah chatlak loa fund a kal theih nan state matching share atan cheng vbc 50 a dah bawk. School, hostels leh teacher quarter chhiate thawmṭhat nan cheng vbc 25 a ruahman bawk a, a hun taka zirlaite stipend pek a nih theih nan budget-ah cheng vbc 20 a dah.

Agriculture sector-ah vbc 20.68 ruahman a ni bawk a, housing for police personnel scheme kalpuina atan vbc50 dah a nih bakah MLA Local Area Development fund chu vbc 1.25 aṭangin vbc 1.50-ah tihpun a ni bawk. State sorkar hnathawkte dearness allowance (DA) chu 107% aṭangin 113%-ah tihpun nih tur thu Chief Minister Tuki chuan a sawi bawk.

Budget-ah hian working journalist te corpus fund cheng nuai 30 chu vaibelchhe khatah tihpun a ni bawk.

NITI Aayog-a Planning Com­mission thlak a nih vanga central scheme-a funding pattern tihdanglam vang leh state-in sorkar laipuia grant a dilte tihfel a nih loh vangin Tuki hian kumin March thla khan thla li chhunga state sum hman tur Vote-on-Account a lo pharh tawh a ni.