NE hmasawn nan vbc 92,000 ruahman

Prime Minister Na­ren­dra Modi kaihhruaina hnuaia Nilainia NITI Aayog meeting neihah sorkar laipui chuan hmar­chhak bial hmasawn nan cheng vaibelchhe 92,000 a ruahman thu a tarlang.

Nilainia meeting-ah hian hmarchhak bial aṭangin Congress sor­kar­na state- Assam, Megha­laya, Manipur, Arunachal Pradesh leh Mizoram Chief Minister te an tel lo a, hetihlai hian party dang sorkarna state- Nagaland, Sikkim leh Tripura Chief Minister erawh an tel thung. Congress party hian Land Acquisition bill chungchanga BJP sorkar hmalakna a dodal avangin NITI Aayog meeting hi a boycott a, hei vang hian India rama Congress sorkarna state pakua Chief Minister te an tel lo a ni.

Prime Minister Modi chuan a kaihhruai sorkarin hmarchhak bial hmasawn nan inkalpawhna kawng­pui leh rela inkalpawhna tihchangtlun nan theih­tawp chhuahin hma a lak thu a sawi.

Land Acquisition bill chungchangah Mo­di chuan bill avanga politics thila in­beihna chuan thingtlang biala hmasawnna a nghawng a ti a, bill kal­tlangpui theih a nih loh avangin school, hospital, road leh irrigation project te a ṭhuanawp phah a ni, a ti.