Manipur Assembly-in Migrant Workers Bill hnukkir

Joint Committee on Inner Line Permit System (JCILPS)-in nasa taka a nawr hnuah Manipur Assembly chuan Nilaini khan Manipur Regulation of Visitors, Tenants and Migrant Workers Bill (MRVTMW), 2015 a hnukkir.

JCILPS-in pemlutte lak aṭanga leilung fate humhalhna turin inner line permit (ILP) system emaw a tlukpui dan siam tura a phut hnuah state sorkar chuan political party zawng zawng telna committee dinin, MRVTMW Bill hi duan a ni a, March 16 khan special session-a pass a ni. Mahse JCIILPS chuan bill hi a hriam tawk lo tiin, bill thar siam a phut.

Nilainia emergency ses­sion neihah Chief Minister Ibobi Singh chuan thla thum chhungin state sorkarin special session-ah bill thar pharh leh a tum thu a sawi a, mahse ni 15 chhunga bill thar buatsaih hman a nih chuan special session neih nghal a ni ang, a ti.

Hetihlai hian JCILPS chuan sorkar thutlukna a pawm theih loh avangin a la nuar chhunzawm zel. JCILPS hotu Kh Ratan chuan sorkarin bill thar pass-na atana thla thum a bithliah chu ni 15-ah sawr zim tura a phut thu a sawi. Hemi chungchangah hian JCILPS chuan thuchhuah siam nghalin, ni 15 chhunga bill thar pass turin state sorkar a phut a ni.