Nagaland: Wokha district-ah kangmei chhuak

March 17 chawhnu khan Nagaland Wokha district-a Humtso leh Wokha khuaah kangmei nasa tak a chhuak a, lo neihna hmun leh thlai chinte nasa takin a tichhia. Thuneitute chuan kangmei hi lo hal aṭanga lo chhuak niin an ring.

Wokha District Disaster Management Authority (DDMA) chu chawhnu dar 1 vel khan kangmei chhuah thu hi hriattir an ni a, hemi hnu hian kangmei darh chak tak thunun turin kangṭhelh hna thawh nghal a ni. Mahse, thlipui na tak chuan kangmei chu a tizual a, kangṭhelh a harsa hle. Kangmei ven hna thawktute chuan strategy hrang hrang an hmang a, chenna in bulah kangmei venna line siam a ni a, mahse kangmei hi thunun theih lohin a darh chhunzawm zel a ni.

State Disaster Response Force (SDRF) leh Fire & Emergency Services team-te chuan theihtawp chhuahin kangṭhelh hna an thawh chhunzawm zel a, Thawhlehni zing dar 12:55 thleng an thawk a ni. Nasa taka an beih hnuah pawh Thawhlehni chawhnu thleng khan hmun hnihah kangmei hi ṭhelh mih theih a ni lo. Nuhuta Tunyi, Sub-Divisional Officer (SDO) (Civil) Wokha sawi danin, heng hmunte hi ram zau leh tlawhpawh harsa tak a nih avangin kangṭhelh a harsat thu a sawi a, a ṭul chuan aerial firefighting neih tur a nih thu an tarlang bawk.

DDMA chuan kangmei chhuah chhan dik tak hriat chian a la nih loh laiin, Humtso leh Wokha khuaa loneihna ram zau tak a kangral tawh thu an sawi. Fire service team leh SDRF-te chu kawngpui dungah an awm reng a, chhiatna nasa zawk a thlen loh nan leh chenna hmun humhalh a ni. Thuneitute chuan thil awmdan zirchian chhunzawm zelin, kangmei hi a tawp thei lo a nih chuan helicopter hmanga hmalakna dang ngaihtuah tura ruahman a ni.