Tripura: State level youth parliament buatsaih dawn

Tripura sorkar chuan state level Youth Parliament intihsiakna buatsaih a rel. March 23 hian Tripura Legislative Assembly-ah neih a ni ang.

Nilainia press conference-a thu a sawiah, Tripura Sports and Youth Affairs minister Tinku Roy chuan state level Youth Parliament intihsiakna chu March 23 hian Tripura Legislative Assembly-ah neih a ni dawn a, he hunah hian state chhunga district pariat aṭanga thlan chhuah, kum 15 leh 25 inkar ṭhalai thiam tak tak 40 an tel dawn tih a sawi.

He programme hi kum 2019 khan ṭhalaite tan buatsaih ṭan niin, India prime minister Narendra Modi hmathlir kaihhruaina hnuaiah a ni. State level Youth Parliament intihsiakna hian ram hmangaihna rilru aṭanga infuih tharna, India ram hmasawnna kawnga ṭhalaite ngaihtuahnate pawh a huam tel dawn a ni. State puma inelna atana thlan chhuah pathumte chu Delhi-a central-level Youth Parliament competition-ah tirh an ni dawn tih a sawi bawk.

Hei bakah hian state pumah talent search programme kalpui a nih thur sawiin, February 4-a Youth Affairs and Sports Department-in programme a kalpuiah hian state chhunga block zawng zawng, municipal council, nagar panchayat, leh municipal corporation hrang hranga zone 247 aṭangin infiammi ṭhalai 34,571 an tel a ni. Hetiang programme hi state pumah a bulṭhut aṭanga infiammi thiam tak takte thlanchhuahna atana kalpui a nih vawi khatna a ni.

Infiammi thiam tak takte chu football, kho-kho, kabaddi, leh athletics-ah category pahnih, kum 10 hnuai lam leh kum 14 hnuai lamah an tel a ni. State chhunga municipal council, nagar panchayat, block, leh municipal corporation aṭanga player thlan chhuahte chu sub-district leh district level-ah an inel ṭhin a ni, tiin a sawi bawk.